Natur.is

Veðurkort á Náttúrunni

Einn af þjónustuliðum Náttúrunnar er veðurkort. Náttúran.is nýtir sér þjónustu Veðurstofunnar og Reiknistofu í veðurfræði og birtir bæði hefðbundna veðurspá og veðurathuganir auk veðurþáttaspáar sem mörgum finnst gagnlegri.

Tengill á veðrið er undir valmyndinni fréttir > veður og einnig hér til hægri á síðunni „Veðurspá“ en þar birtast einnig viðvaranir þegar svo ber undir.

Bewertung

Veðurtafla - verkefni

Að halda veðurtöflur hjálpar börnum að læra að þekkja og skilja mismunandi veðurfar.

Til að búa til veðurtöflu þarftu pappír/karton, dagatal og penna.

Teiknið dagatal næsta mánaðar eða þess mánaðar sem að halda á veðurtöfluna í á stóra pappírsörk eða karton og hengdu hana á áberandi stað. Í lok dagsins getur fjölskyldan rætt hvernig veðrið hefur verið um daginn og síðan teiknað inn merki á viðeigandi dag á dagatalinu. Ákveðið einföld merki fyrir storm, rigningu, ský, vind, sól o.sv.fr.

Í lok mánaðar er svo hægt að skoða hvernig veðurfarið hefur verið þennan mánuðinn og bera hann saman við aðra mánuði.

Börn læra mikið af því að fylgjast með veðrinu og getur þetta aukið áhuga þeirra á umhverfi sínu og veðrinu í mismunandi heimshlutum.

Bewertung

Stormviðvörun fimmtudaginn 6. janúar 2011

Almannavarnadeild ríkslögreglustjóra vill vekja athygli á því að Veðurstofan varar við stormi um allt land og talsverðri ofankomu norðaustanlands.

Spá Veðurstofunnar sem gerð var í morgun og gildir til kl. 18:00 7. janúar er svohljóðandi: Norðaustan og síðan norðan 13-23, hvassast austanlands, með éljagangi N- og A-til, en skýjað að mestu syðra. Norðan 18-28 seint í kvöld og snjókoma um norðanvert landið. Lægir talsvert á Austurlandi upp úr miðnætti. Norðaustan 10-18 síðdegis á morgun og él N- og A-lands. Frost 3 til 15 stig, kaldast inn til landsins. Hiti kringum frostmark með A- og S-ströndinni á morgun.

Nú þegar er farið að hvessa víða norðanlands og austan og útlit fyrir að bæti í vind í dag en að veðrið verði verst frá miðnætti.

Rétt er að benda á að búast má við sterkum vindhviðum sunnan fjalla svo sem á Snæfellsnesi, á Kjalarnesi, undir Eyjafjöllum, við Lómagnúp, í Öræfum og svo áfram þaðan austur og norður með ströndinni.

Þá er einnig ástæða til að benda á að nú er stórstreymt og verður morgunflóðið í Reykjavík kl. 07:00 í fyrramálið og er sjávarstöðu spáð í 4,16 metrum að áhlaðanda meðtöldum. Á Húsavík verður sjávarstaðan hæst á kvöldflóðinu í kvöld en það verður um miðnættið, þá er spáð að áhlaðandi verði um 40 sentimetrar og sjávarstaða verði í 1,63 metrum. Háflóð á Raufarhöfn verður um kl. 02 í nótt.

Bewertung

Svifryk yfir mörkum í dag og ef til vill næstu daga

Styrkur svifryks (PM10) mun mælast yfir  heilsuverndarmörkum í Reykjavík í dag, 4. janúar. Líkur eru á svifryksmengun næstu daga. Hálftímagildi svifryks klukkan 11 mældist tæplega 500 míkrógrömm á rúmmetra við Grensásveg og meðaltalið frá miðnætti var 231. Heilsuverndarmörk á sólarhring eru 50 míkrógrömm.

Hálftímagildið klukkan 10 í farstöð Umhverfis- og samgöngusviðsvið Tunguveg í Bústaðahverfi mældist 143 míkrógrömm á rúmmetra og meðaltalið frá miðnætti var 103.

Norðanstæður vindur er á Faxaflóasvæðinu, þurrviðri og lágt rakastig. Töluverður vindur ásamt bílaumferð þyrlar nú upp ryki í borginni og veldur svifryksmengun. Þeir sem eru með viðkvæm öndunarfæri ættu taka tillit til aðstæðna og fylgjast með loftgæðum á vefmæli borgarinnar sem sýnir svifryksmengun við Grensásveg en þar mælist jafnan mesta mengunin.

Sjá loftgæða vefmæli Reykjavíkurborgar.

Bewertung

Tilkynning frá Heilbrigðiseftirliti Reykjavíkur

Styrkur svifryks á höfuðborgarsvæðinu fer yfir heilsuverndarmörkin í dag, 4. júní. Hálftímagildið klukkan 12.30  í dag á mælistöð Reykjavíkurborgar við Grensásveg mældist 116 míkrógrömm á rúmmetra og í Fjölskyldu – og húsdýragarðinum var 86. Meðalgildið frá miðnætti við Grensásveg í hádeginu var 85 míkrógrömm á rúmmetra. Heilsuverndarmörk svifryks á sólarhring eru 50 míkrógrömm á rúmmetra. Svifryk berst sennilega að mestu leyti frá öskufallssvæðinu við Eyjafjallajökul. Ástæða er til að benda þeim á sem eru með viðkvæm öndunarfæri s.s. lungnasjúkdóma eða astma að forðast mikla útiveru í dag og ef til vill á morgun - en líkur eru á betri loftgæðum á sunnudaginn.

Suðaustlægar áttir eru ríkjandi og töluverður vindur er til staðar. Ekki er búist við úrkomu í kvöld. Draga mun úr vindstyrk á morgun, 5. júní, en áfram eru líkur á svifryksgildum yfir heilsuverndarmörkum á höfuðborgarsvæðinu. Íbúar eru geta fylgst með fréttum og kynnt sér upplýsingar og leiðbeiningar á heimasíðum Almannavarna, www.almannavarnir.is og Landlæknis, www.landlaeknir.is, Umhverfisstofnunar, www.ust.is og á vefmæli Reykjavíkurborgar (neðst á heimasíðu www.reykjavik.is) sem sýnir styrk svifryks (PM10) hverju sinni).

Athugið:
1. Varðandi loftgæði í öðrum sveitafélögum er vísað á viðkomandi heilbrigðiseftirlit.
2. Mælistöð í Hafnarfirði www.vista.is.
3. Heilsuverndarmörk eru ekki hættumörk.

Frekari upplýsingar veitir:
Anna Rósa Böðvarsdóttir heilbrigðisfulltrúi s. 693 9678
Kristín Lóa Ólafsdóttir s. 411 8875

Mynd: Myndin sýnir öskufok yfir Suðurlandi, Reykjanesi og höfuðborgarsvæðinu. Kortamynd frá Landmælingum Íslands og Landhelgisgæslunni.

Bewertung