Natur.is

09.02.2012 kl. 21:20

Ábending frá veðurfræðingi

Kröpp lægð fer norðaustur yfir vestanvert landið í kvöld. Talsverð hríðarmugga verður um landið norðvestanvert frá því síðdegi og fram á kvöldið, einkum á fjallvegum, en annars setur víða niður krapa þó svo að sunnan og suðaustantil verði hlýrra og með rigningu. Snýst í hvassa SV- og V-átt seint í kvöld og nótt, einkum á Vestfjörðum og Norðurlandi með kólnandi veðri og éljum. Gera má ráð fyrir einkar byljóttum vindi og miklum hviðum í skamma stund um og eftir miðnætti á Siglufjarðarvegi og við vestanverðan Eyjafjörð.

Færð og aðstæður

Hálkublettir eru í Þrengslum og á Hellisheiði.

Um vestanvert landið er snjóþekja á Holtavörðuheiði og nokkuð víða á Snæfellsnesi. Annars er orðið autt nokkuð víða en þó hálkublettir sumstaðar.

Þæfingsfærð og snjókoma er víða á norðanverðum Vestfjörðum en snjóþekja og snjókoma á Þröskuldum. Annars eru hálkublettir, þæfingur og einhver éljagangur nokkuð víða.

Á Norðurlandi er hálka eða hálkublettir á flestum leiðum.

Austanlands er hálka eða hálkublettir á fjallvegum en meira og minna autt á láglendi.

Þungatakmarkanir

Þungatakmarkanir eru nú víða um land.

Misjafnir þjónustutímar

Vegfarendur eru beðnir að hafa í huga að víða er ekki mokstur eða önnur þjónusta á vegum, á kvöldin og yfir nóttina. Þá eru sumir vegir ekki í þjónustu nema fáa daga í viku. Upplýsingar um þjónustutíma eru á vef Vegagerðarinnar og í síma 1777.

Hreindýr á Austur- og Suðausturlandi

Vegagerðin og Náttúrustofa Austurlands vara vegfarendur við umferð hreindýra á Austur- og Suðausturlandi.

Sjá má staðsetningu hreindýrasvæða hér.

Upplýsingar birtar með fyrirvara um heimild og tæknilegt aðgengi að upplýsingum
Heimild: Vegagerðin