Natur.is

Nudd með eplaediki

Blandið 2-3 matskeiðar af eplaediki í einn líter af vatni. Nuddaðu allan líkamann með þessari upplausn eftir bað eða sturtu. Þannig má hreinsa alla sápuafganga í burtu um leið og edikið fjarlægir lykt. Þetta má gera daglega eða í það minnsta vikulega.

Bewertung

Húsið og umhverfið - Póstur

Bréfasendingar eru mun sjaldgæfari en áður fyrr. Ýmis símþjónusta, netpóstur og upplýsingar á vefsíðum hafa leyst pappírspóstinn að mestu af hólmi. Það ætti að þýða að álag á póstkassana okkar hafi minnkað en því er öðru nær. Enn berst ýmis „leiðinlegur póstur“ heim, bankayfirlit og reikningar sem mörg hver er hægt að afpanta í prentuðu formi og spara með því að fá þau frekar sent í Pdf-formi eða fá beinan netaðgang að upplýsingunum. Það er þess virði að skoða vel hvað má afpanta og hvað er nauðsynlegt að hafa í pappírsformi t.d. fyrir bókhaldið.

Mikið skóglendi þarf til að framleiða pappír í allan þann fjölpóst og dagblöð sem eru aðeins fersk og áhugaverð í einn dag eða svo. Bæði framleiðslan og flutningar skilja eftir sig slóð af neikvæðum umhverfisáhrifum svo sem losun á kolefni. Á löngum tíma eyðist pappírinn sjálfur og brotnar niður. Ef pappírinn er endurunninn nýtist hann í grófari pappírsframleiðslu s.s. klósettpappír og jafnvel til metanframleiðslu.

Fjölpóstur eru dagblöð og auglýsingaefni sem kemur óumbeðið í póstkassann okkar. Hvert heimili fær að meðaltali um 176 kg. inn um lúguna á ári. Þeir sem ekki telja sig hafa gagn af fjölpósti geta nú afþakkað hann á pósthúsum og fengið miða til að líma á póstkassann hjá sér um að ekki sé óskað eftir fjölpósti. Einnig er hægt að fylla út eyðublað á vef Íslandspóst þar sem fjölpóstur er afþakkaður og miðinn þá sendur heim innan tveggja vikna. Íslandspóstur dreifir þó aðeins um 12% af fjölpóstinum sem borinn er út. Þú getur einnig hringt í Þjóðskrá (Sími: 569 2900) eða sent tölvupóst til thjodskra@thjodskra.is (með nafni og kennitölu) og látið setja bannmerki við nafnið þitt. Bannmerki við nafn í Þjóðskrá þýðir að ekki er heimilt að senda þér fjölpóst merktan þér.

Fyrirtækin nota tölur frá Þjóðskrá við að áætla hve hátt upplag verður á tilteknu prentefni og örfá fyrirtæki hafa aðgang að Þjóðskrá til að bjóða markhópagreiningu til að senda póst á ákveðinn markhóp í auglýsingaskyni. Það kemur því tvímælalaust í veg fyrir óþarfa álag á umhverfið að hafa fyrir því að senda tölvupóst til Þjóðskrár og láta setja bannmerki við nafnið sitt ef enginn áhugi er fyrir því að fá óumbeðnar sendingar af þessu tagi.

Hvað varðar annan fjölpóst sem fer inn á heimilin á landinu verður það að segjast eins og er að í dag er ekki auðvelt að komast hjá því að fá óumbeðinn fjölpóst sem sumir kalla ruslpóst inn um lúguna hjá sér. Verið er að vinna í því að finna lausn á vandanum en nefnd á vegum Umhverfisráðuneytisins vinnur nú að því að finna lausnir. Markmið nefndarinnar er að finna leiðir til að minnka magn pappírs sem fellur til á þennan hátt og koma á einhverskonar framleiðendaábyrgð.

Með dagblöð gildir þó að þú verður að hringja til viðkomandi blaðs og biðja um að blaðið verði ekki sett inn um lúguna þína. Fréttblaðið tekur t.a.m. við skilaboðum af þessu tagi, skráir og kemur skilaboðunum á framfæri við blaðbera. Flest dagblöð er nú hvort eð er hægt að lesa í Pdf-útgáfum á netinu.

Skoðaðu allt um hvernig hægt er að lifa umhverfisvænna lífi í flokknum Húsið og umhverfið hér á vefnum.

Bewertung

Náttúruspilin á netinu

Náttúran.is hefur útfært Náttúruspilastokkinn í netútgáfu. Hann geta þeir sem vilja sett á vefsíður sínar. Til þess þarf að setja inn örítinn kóðabút sem kallar á spilin. Við hverja hleðslu síðunnar er er sótt spil út stokknum af handahófi og birt.

Hægt er að stilla af breidd spilsins en hæðin er föst 400 pixel. Til að stilla breiddina er sú tala sem hentar sett í kóðann á báða staðina sem 290 stendur í dæminu að neðan. Þeir sem hafa til þess þekkingu get líka búið sér til AJAX tengingu sem hleður nýju spili á tilteknum fresti. Þeim til upplýsinga er 290 í vefslóðinni breyta sem segir til um breiddina. Ekki er æskilegt að nota meiri breidd en 470 pixel því myndin er gerð í þeirri stærð og gæti orðið óskýr við stækkun.

Nokkuð hefur verið spurt um þennan möguleika og nú er hann orðinn að veruleika sem vonandi getur gagnast og glatt vini náttúrunnar.

Hér er kóðinn:

<iframe src="http://www.natturan.is/spilin/290/" width="290" height="400" marginheight="0" marginwidth="0" frameborder="0" scrolling="no"></iframe>

Bewertung

Sex leiðir til að skilja á grænum nótum

Sambúðarslit eru ekki óalgeng nú í kreppunni þar sem lífið er hörkuerfitt og taugarnar strekkjast til hins ítrasta þegar fjárhagsörðugleikar koma fólki á kaldan klaka. En sambúðarslit fela í sér margar „ógrænar“ gjörðir, af þeirri einföldu ástæðu að parið sem deildi hlutum þarf nú að skipta dótinu á milli sín og þá vantar oftast nær eitthvað í skörðin, báðu megin borðsins. Hluti sem þarf að kaupa og það oft með hraði og að óyfirveguðu máli geta verið mikil sóun á náttúruverðmætum, utan þess sem vera þyrfti ef hugsað væri út í hlutina á umhverfismeðvitaðan hátt.

Á vefnum planetgreen.discovery.com, einum fremsta umhverfisvef vestanhafs er fjallað um sex punkta til að „grænka“ aðeins á skilnaðinum. Ráðin hafa verið staðfærð og tengd íslenskum raunveruleika:

1. Skiptið með ykkur húsgögnum, skrauti og öðru gagnlegu (og ógagnlegu). Vinnið saman að því að skipta hlutunum jafnt frekar en að láta einn aðilann fá allt gamla dótið þannig að hinn þurfi að kaupa allt nýtt. Þannig ný tum við verðmæti betur og minnkum sóun. Ef ykkur tekst að sjá skiptingu muna frekar sem tækifæri til að „losa ykkur við“ gamla lífsmynstrið og gefa færi á fersku nýju lífi, en sorglegan skilnað við veraldlega hluti, verður skilnaðurinn mun auðveldari. Nóg er af tilfinningum til að fást við þó ekki komi til sorg yfir gömlu dóti. Það sem hvorugt ykkar vantar er tilvalið að koma til þurfandi t.d. til Góða hirðisins eða líknarfélaga. Tekið er á móti munum á móttökustöðum Sorpu og á öðrum móttökustöðum um allt land. Sjá Endurvinnslukortið.
2. Hægt er að finna huggun á mörkuðum og heimagerðum máltíðum. Að elda fyrir einn getur verið mun dýrara því það eru meiri líkur á því að þú kaupir í litlum einingum, sem eru oftast dýrari. Þú getur samt haldið verðinu í lágmarki með því að skipuleggja innkaupin og versla t.d. á bændamörkuðum, eða heimavinnsluaðilum um allt land eða panta á Náttúrumarkaðinum og fá sent beint heim, farið á heilsumatstað eða farið í heilsuvörubúðir og valið lífrænar og góðar vörur, líka í litlu magni. Gott er að hafa í huga að elda almennilegar grunnmáltíðir sem duga langt fram á vikuna. T.d. pottrétti án kjöts, með baunum, hrísgrjónum og grænmeti.
3. Þú gætir hjólað, farið í strætó eða verið samferða öðrum. Ef þið skiptuð með ykkur einum bíl í sambúðinni og þú ert sá/sú sem situr eftir bíllaus má leysa það á ýmsa vegu. Þó að það sé kannski tímabundið ástand má reyna að sjá bílleysið sem tækifæri til að ferðast um á umhverfisvænni og heilbrigðari hátt. Taktu fram hjólið, hringdu til vinnufélaga og kunningja um að fá að fljóta með eða notaðu samferda.net til að fara lengri ferðir. Nú svo má ekki gleyma því að strætó og rútur voru einu sinni aðalferðamáti fólks og við erum ekkert of góð til að nota almenningssamgöngur. Í strætó stendur tíminn svolítið í stað og tími gefst til að hugsa málin, lesa eða láta sig dreyma!
4. Að leigja með öðrum. Það getur verið alger bömmer að vera allt í einu ein/einn eða jafnvel „á götunni“. Frekar en að búa einn getur verið gott að leigja með öðrum, þó ekki sé nema tímabundið. Fyrir utan hvað það getur verið miklu skemmtilegra þá sparar þú örugglega bæði peninga og náttúruauðæfi.
5. Að halda græn teiti og hitta nýtt fólk. Það er mikilvægt að hitta nýtt fólk þegar þú ert aftur óbundin/nn. Þú gætir t.d. boðið heim í „náttúrulegan kost“ t.d. með lífrænum mat og lífrænu víni eða efnt til útiteitis í götunni þinni og fundið mat úr garðinum eða næsta nágrenni sem meginuppistöðu eða meðlæti. Allir geta jafnvel tekið þátt í að finna hvað er ætilegt. Í bók Hildar Hákonardóttur Ætigarðinum má finna ótal upplýsingar um grænt og gott til átu, beint úr garðinum. Næstum allt má borða, þetta gerir okku óháðari grænmetisborðinu í stórmarkaðinum og nú þegar allt iðar af lífi er tilvalið tækifæri til að læra að verða sjálfbær um fæði.
6. Þú verður örugglega ekki á lausu til eilífðarnóns. Í sambandi eða ekki, umhverfishugsun á alltaf við og sparar þér alltaf aur þegar á heildina er litið. Það er ekkert hallærislegra í dag en sóun verðmæta og algerlega ósexí. Heilsumatstaðir og grænar uppákomur af alls kyns tagi eru í boði um allt land. Kíktu bara á Græna kortið og sjáðu hvað landið okkar hefur upp á rosalega mikið að bjóða!

Bewertung

Bíllinn og umhverfið - allt um bílinn

• Best er að fara með bílinn í allsherjarskoðun hjá bílaumboðinu að minnsta kosti einu sinni á ári.
• Ráðlagt er að gá að loftþrýstingnum í dekkjunum reglulega.
• Dekkin slitna minna ef loftþrýstingurinn er réttur auk þess sem eldsneyti sparast ef dekkin eru ekki of loftlítil.
• Gott er að bóna bílinn nokkrum sinnum á ári. Þá festist olía og ryk síður á bílnum. Hreinn bíll sparar eldsneyti því viðmótið af óhreinindunum hefur sín áhrif. Sjá einnig Lakk og umhirða þess.
• Hægt er að fá vistvæn og umhverfismerkt hreinsiefni fyrir bílinn. Betra er að velja hreinsiefni sem byggir á propylenglykol en etylenglykol. Propylenglykol er minna eitrað. Ensímefni eru vistvæn lausn. Umhverfismerkt hreinsiefni eru til í miklu úrvali í dag.
• Nauðsynlegt er að hafa viftu í bílskúrnum til að halda loftinu á hreyfingu, sérstaklega þegar bíllinn kemur blautur inn eða snjóbarinn. Annars ryðgar bíllinn mjög fljótt.

Nokkur öryggisatriði

• Hættulegt er að geyma drasl í bílnum. Það getur kastast til við árekstur og valdið miklum skaða.
• Ónauðsynlegt er að nota nagladekk nema algjöra nauðsyn krefji.
• Ráðlagt er að taka toppgrindina og tengdamömmuboxið af bílnum þegar þú þarft ekki á þeim að halda. Box eykur loftmótstöðu og eyðslu um allt að einn lítra á hverja 100 km.
• Aktu á löglegum hraða. Bíll sem keyrir á 100 km hraða í stað 80 km/klst. eyðir um 20% meira eldsneyti. Ef þér liggur lífið á að ná næsta rauða ljósi, hafðu þá í huga að stór hluti eldsneytisnotkunar innanbæjar fer í að taka af stað. Best er að halda jöfnum hraða.

Þarftu raunverulega bíl?

Bewertung