Natur.is

Viðurkenningar fyrir starf að umhverfismálum

Svandís Svavarsdóttir umhverfisráðherra afhenti Þóru Ellen Þórhallsdóttur Náttúruverndarviðurkenningu Sigríðar í Brattholti við athöfn í Þjóðmenningarhúsinu í dag. Við sama tækifæri fengu Farfuglaheimilin í Reykjavík afhentan Kuðunginn, umhverfisviðurkenningu umhverfisráðuneytisins, og nemendur Þjórsárskóla voru útnefndir Varðliðar umhverfisins.

Náttúruverndarviðurkenning Sigríðar í Brattholti

Þetta er í annað sinn sem Náttúruverndarviðurkenning Sigríðar í Brattholti er veitt. Með viðurkenningunni er lögð áhersla á mikilvægi framlags almennings til náttúruverndar og er viðurkenningin veitt einstaklingi sem hefur unnið markvert starf á sviði náttúruverndarmála. Fram kom í máli umhverfisráðherra að Þóra Ellen Þórhallsdóttir væri vísindamaður sem hefði unnið merkar rannsóknir á gróðri Íslands og miðlað þekkingu sinni, ekki bara til stúdenta, heldur til þjóðarinnar allrar með fyrirlestrum og fjölmiðlaþátttöku. Hún væri óhrædd við að koma fram með vísindaleg rök til verndar náttúru Íslands, þó það hafi ekki alltaf fallið að ríkjandi skoðunum. Þá hafi vinna hennar við landslagsmat markað tímamót varðandi vernd náttúru hér á landi.

Kuðungurinn

Farfuglaheimilin í Reykjavík fengu Kuðunginn fyrir framlag sitt til umhverfismála á síðastliðnu ári.  Að þessu sinni voru sautján fyrirtæki og stofnanir tilnefnd til Kuðungsins.

Farfuglaheimilin eru einu umhverfisvottuðu gististaðirnir á höfuðborgarsvæðinu og eru ásamt tveimur sænskum farfuglaheimilum, einu farfuglaheimilin á Norðurlöndunum með Svansvottun. Gestum farfuglaheimilanna í Reykjavík er veitt fræðsla um umhverfismál og góða umgengni við náttúruna og þeir hvattir til að ganga, hjóla eða nýta sér almenningssamgöngur. Einnig fá gestir leiðbeiningar um vistakstur og vakin er sérstök athygli á banni við akstri utan vega. Við innkaup er innlend og helst vottuð vara valin og úrgangur er lágmarkaður með því að hafna óþarfa umbúðum. Það rusl sem til fellur er flokkað í fjórtán flokka í samstarfi við Gámaþjónustuna. Markvisst er fylgst með vatns- og orkunotkun og einungis er boðið upp á umhverfisvottað þvottaefni og sápur. Á kaffihúsum Farfugla er eingöngu notað lífrænt fair-trade kaffi og leitast er við að bjóða upp á sem mest af innlendum og lífrænt ræktuðum matvælum í morgunmat. Fram kom í máli Sigþrúðar Jónsdóttur, formanns valnefndar, að farfuglaheimilin uppfylltu allar kröfur sem gerðar væru til handhafa Kuðungsins og vel það. Starfsemi þeirra væri gloppulaus og umhverfismál væru óaðskiljanlegur þáttur í rekstri þeirra.

Í valnefnd Kuðungsins sátu að þessu sinni þau Sigþrúður Jónsdóttir fyrir hönd umhverfisráðherra, Margrét Ingþórsdóttir fyrir Alþýðusamband Íslands, Ragnheiður Héðinsdóttir fyrir Samtök atvinnulífsins og Morten Lange fyrir félagasamtök á sviði umhverfismála. Verðlaunagripurinn Kuðungurinn var í ár búinn til af Ingunni Elínu Kristinsdóttur myndlistarmanni.

Varðliðar umhverfisins

Nemendur í umhverfisnefnd Þjórsárskóla í Skeiða- og Gnúpverjahreppi voru útnefndir Varðliðar umhverfisins fyrir útgáfu ruslabæklings fyrir börn á öllum aldri. Bæklingnum verður dreift á öll heimili og sumarbústaði í hreppnum. Markmið nemendanna með verkefninu er að leggja sitt af mörkum til að auka og stuðla að skilningi á breyttu fyrirkomulagi sorphirðu í sveitarfélaginu sem ætlað er að auka endurvinnslu úrgangs.

Ljósmyndir: Efst; Svandís Svavarsdóttir umhverfisráðherra afhendir Þóru Ellen Þórhallsdóttur Náttúruverndarviðurkenningu Sigríðar frá Brattholti. Miðmynd; Sigríður tekur við Kuðungnum úr hendi Svandísar Svavarsdóttur umhverfisráðherra.. Neðsta myndin er af Varðliðum umhvefisins, nemendum í umhverfisnefnd Þjórsárskóla í Skeiða- og Gnúpverjahreppi ásamt ásamt Orra Páli Jóhannssyni verkefnisstjóra Grænfánans og Svandísi Svavarsdóttur umhverfisráðherra.

Bewertung

Dagur umhverfisins og sagan

Dagur umhverfisins á Íslandi á sér ekki ýkja langa sögu. Tilurð hans var með þeim hætti að þann 25. apríl árið 1999 tilkynnti ríkisstjórn Íslands, að ákvörðun hafi verið tekin um að tileinka „umhverfinu“ einn dag ár hvert og var dagsetningin ákveðin 25. apríl fyrir valinu. Það er fæðingardagur Sveins Pálssonar en hann var fyrstur íslendinga til að nema náttúruvísindi og lauk námi í frá Kaupmannahafnarháskóla árið 1791. Hann var einna fyrstur til að hvetja til aðgerða gegn skógareyðingu á Íslandi og orðaði þá hugsun sem nú kallast sjálfbær þróun.

Umhverfisráðuneytið veitir umhverfisviðurkenninguna Kuðunginn á Degi umhverfisins ár hvert. Sjá þá sem hlotið hafa Kuðunginn hér á Grænum síðum.

Til upprifjunar:

Náttúran.is var opnuð af þáverandi umhverfisráðherra Jónínu Bjartmars, á Degi umhverfisins árið 2007, við einfalda umhverfisdagsathöfn á Kjarvalsstöðum. Það ár fékk Bechtel, undirverktaki við byggingu Kárahnjúkavirkjunar, Kuðunginn. Mörgum þótti það einkennilegt val enda fyrirtækið Bechtel ekki einungis frægt fyrir að vera til fyrirmyndar í umhverfismálum.

Á Degi umhverfisins árið 2008 flykktust umhverfisverndarsinnar úr Samfylkingunni á byggingarsvæði álversins sem fyrirhugað var að byggja í Helguvík í brjálærinu, og gróðursettu tvö tré. Eitt trjánna var nefnt Össur og hitt Þórunn. Hugmyndin var auðvitað að gagnrýna framkvæmdina og kalla þáverandi iðnaðarráðherra Össur Skarphéðinsson og umhverfisráðherra Þórunni Sveinbjarnardóttur til ábyrgðar. Sjá nánar í grein um Dag umhverfisins 2008. Umhverfisráðuneytið stóð fyrir sýningunni Vistvænn lífsstíll í Perlunni þar sem fjöldi fyrirtækja tók þátt og kynnti starfsemi sína. Þar á meðal Náttúran.is. Þá hlaut hreingerningarfyrirtækið Sólarræsting Kuðunginn. Sólarræsting var fyrsta hreingerningarfyrirtækið á Íslandi til að fá Svansvottun.

Á Degi umhverfisins árið 2009, þann stutta tíma sem Kolbrún Halldórsdóttir sat í stóli umhverfisráðherra, stóð umhverfisráðuneytið fyrir hátíðardagskrá í Iðnó undir yfirskrfitinn „Græn störf, vistvænar áherslur í atvinnuuppbyggingu“. Fyrirtækin Marorka,Saga Medica, Gavia Travel, HBT Orkusparandi tækni og Prokatín héldu fyrirlestra um umhverfisáherslur í starfsemi sinn. Þetta árið hlaut Íslenska Gámafélagið umhverfisviðurkenninguna Kuðunginn.

Í fyrra hélt Náttúran.is upp á þriggja ára afmæli sitt með opnun nýs vefs sem umhverfisráðherra Svandís Svavarsdóttir opnaði við hátíðahöld umhverfisráðuneytisins í Þjóðmenningarhúsinu. Þá hlaut Prentsmiðjan Oddi Kuðunginn en hafði þá nýlega fengið Svansvottun. Prentsmðjan Oddi er önnur prentsmiðjan á Íslandi til að fá Svansvottun en áður fékk prentsmiðjan Hjá GuðjónÓ Svansvottun níu árum áður. Prentsmiðjan Hjá GuðjónÓ hefur þó aldrei hlotið Kuðunginn. Auk Kuðungsins var í fyrsta sinni veitt  ný viðurkenning, Náttúruverndarviðurkenning Sigriðar í Brattholti og var Sigrún Helgadóttir náttúrufræðingur og uppfræðari með meiru fyrir valinu.

Í ár er flestum hátiðahöldum Dags umhverfisins slegið á frest til 28. apríl vegna þess að hann kemur nú upp á öðrum í Páskum. Dagskrá umhverfisráðuneytisins verður haldin í Þjóðmenningarhúsinu á fimmtudagsmorguninn 28. apríl og hefst kl. 10:00 en þá mun koma í ljós hver hlýtur Kuðunginn og Náttúruverndarviðurkenningu Sigríðar í Brattholti í ár.

Bewertung

Vatnavinir fá hin virtu Alþjóðlegu verðlaun í sjálfbærum arkitektúr 2011

Vatnavinir hafa hlotið hin virtu alþjóðlegu verðlaun í arkitektúr „Global Award for Sustainable Architecture 2011“ fyrir verkefnið Heilsulandið Ísland.  Verðlaunin eru veitt af Locus Foundation sem hefur það að markmiði að veita arkitektum er starfa víða um heim viðurkenningu fyrir framþróun á sviði sjálfbærni í arkitektúr.  Yfir 200 tilnefningar bárust til verðlaunanna og eru fimm viðurkenningar veittar á ári hverju. Vatnavinir samanstanda af alþjóðlegum hópi fagfólks sem koma úr ólíkum greinum byggingarlistar, hönnunar, markaðssetningar, ferðamennsku, heimspeki og listum.

Verðlaunin, eru nú veitt í fimmta sinn, en fyrri verðlaunahafar telja m.a. Snöhetta, arkitektar að Óperuhúsinu í Osló.   Formleg verðlaunaafhending verður  í Cité de l´Architecture í París í maí. Eitt af markmiðum Locus Foundation er að efla alþjóðlegt samstarf sérfræðinga á sviði sjálbærni og að efla aukna vitund fagaðila sem almennings um nauðsyn samfélagslegrar ábyrgðar við mótun manngerðs umhverfis. Arkitektarnir og félagarnir í Vatnavinum Olga Guðrún Sigfúsdóttir, Sigrún Birgisdóttir  og Jörn Frenzel kynna verkefni Vatnavina í Cité de l´Architecture í París og taka þátt í ráðstefnu á vegum Unesco og Locus Foundation „ Rediefining progress: Architecture for a new Humanism“ í lok maí á þessu ári.

Vefsíða Vatnavina: www.vatnavinir.is
Vefsíða Locus Foundation: www.locus-foundation.org,www.global-award.org

Vatnavinir hafa unnið að hugmyndafræði sem byggir á fjölbreyttri uppbyggingu atvinnulífs og sjálfbærri nýtingu auðlinda Íslands með heilsutengdri ferðaþjónustu í nánum tengslum við jarðvarma og náttúru landsins. Undir yfirskriftinni Heilsulandið Ísland hafa þau kortlagt staði og möguleika, og unnið að endurbótum á eldri laugum og baðstöðum ásamt því að koma að uppbyggingu nýrra heilsulinda víðsvegar um landið. Baðmenning Íslendinga er einstök á heimsvísu og byggir hún á einstökum náttúrgæðum landsins. Vatnið, bæði heitt og kalt er ómengað og gætt fjölbreyttum eiginleikum og er aðdráttarafl fyrir innlenda sem erlenda gesti. Verkefnið Heilsulandið Ísland hefur að markmiði að byggja á  einstakri staðarmyndun heitra lauga á Íslandi og nýta laugarnar til stuðla að fjölbreyttri heilsutengdri afþreyingu og upplifunum fyrir ferðamenn.  Verkefnið fjallar um að virkja samvinnu þeirra fjölmörgu aðila sem koma að atvinnusköpun og ferðaþjónustu um land allt.

Vestfirðir voru í farabroddi á landsvísu með stofnun Vatnavina Vestfjarða vorið 2009.  Vatnavinir Vestfjarða er samstarfsnet landeigenda og staðarhaldara lauga á Vestfjörðum, sveitarfélaga og Markaðsstofu Vestfjarða ásamt Atvinnuþróunarfélagi Vestfjarða (ATVEST) og Vatnavinum sem hlúðu að verkefninu. Ellefu staðarhaldara heitra lauga á Vestfjörðum tóku þátt í að skapa þetta tengslanet fjölbreyttra lauga og að bjóða upp á margvíslega þjónustu fyrir ferðamenn.  Vatnavinir hafa sinnt ráðgjafarhlutverki með hugmyndavinnu, greiningu, þróun og hönnun staðanna. Markmiðið er að þróa vestfirsk aðdráttarafl á heimsvísu tengt vatni, baðmenningu, náttúru, heilsu og útivist og auka þannig verðmætasköpun innan svæðisins. Verkefnið Vatnavinir Vestfjarða hlaut Eden verðlaun Evrópusambandsins og viðurkenningu sem Tourist Destination of Excellence Award fyrir vatnatengda ferðaþjónustu árið 2010.  Að auki vinna Vatnavinir að þróun á jafnt stórum sem smáum heilsutengdum ferða – og meðferðarstöðum um land allt jafnt í þéttbýli, dreifbýli og náttúrulegu umhverfi.

Stofnendur Vatnavina eru: Aðalheiður Lilja Guðmundsdóttir heimspekingur og fjallaleiðsögumaður, Anna G. Sverrisdóttir ferða- og spa- ráðgjafi, Caroline Tayar markaðas- og iðnhönnuður, Igor Micevic grafískur hönnuður, Jörn Frenzel arkitekt og stundakennari við „School of Design thinking“, María Sjöfn Dupuis Davíðsdóttir iðnhönnuður og listamaður, Olga Guðrún Sigfúsdóttir arkitekt FAÍ og stundakennari við LHÍ, Sigrún Birgisdóttir arkitekt FAÍ, lektor og fagstjóri við LHÍ og Sigurður Þorsteinsson markaðs- og iðnhönnuður.

Frekari upplýsingar fást hjá: Olgu Guðrúnu Sigfúsdóttur, olga@vatnavinir.is, s: 6911144 og Sigrúnu Birgisdóttur sigrunbirgis@lhi.is, s: 8683497

Bewertung

Farfuglaheimilin í Reykjavík hljóta umhverfisverðlaun Ferðamálstofu 2010

Umhverfisverðlaun Ferðamálastofu voru veitt í 16. sinn í dag og koma þau að þessu sinni í hlut Farfuglaheimilanna í Reykjavík fyrir markvissa umhverfisstefnu og sjálfbæran rekstur. Katrín Júlíusdóttir, ráðherra ferðamála, afhenti verðlaunin við athöfn á Grand hótel og sagði Farfuglaheimilin í Reykjavík vel að verðlaununum komin.

Umhverfisvottaðir gististaðir

Í dag eru rekin tvö farfuglaheimili í Reykjavík. Farfuglaheimilið á Vesturgötu 17 opnaði á vormánuðum 2009 í glæsilegu húsnæði. Frá opnun hefur Farfuglaheimilið unnið markvisst að því að takmarka áhrif rekstursins á umhverfið og hlaut vottun norræna umhverfismerkisins Svansins um ári eftir opnun heimilisins.

Farfuglaheimilið í Laugardal hefur um langa tíð hagað rekstri sínum í sátt við umhverfið. Árið 2002 hlaut heimilið Umhverfisverðlaun Reykjavíkurborgar fyrir sitt framlag að umhverfismálum og árið 2004 fékk Farfuglaheimilið svansvottun. Heimilið hefur ávallt lagt áherslu á umhverfisfræðslu og hvatt gesti til að taka þátt í umhverfisstarfi á ferðalögum sínum. Farfuglaheimilin leggja sig einnig fram um að bæta nærumhverfi sitt með að taka þátt í og standa fyrir menningarviðburðum sem glæða samfélagið lífi.

Horft til framtíðar

Farfuglar birtu umhverfisstefnu sína árið 1999 og hafa í mörg ár verið í fararbroddi í umhverfisstarfi í ferðaþjónustu á Íslandi. Farfuglaheimilin í Reykjavík eru lykilheimili í hópi 36 farfuglaheimila á Ísland og hafa jákvæð áhrif á umhverfisstarf í fjölbreyttri gistikeðju. Þau eru sem stendur einu svansvottuðu gististaðirnir á Íslandi.

Það er krafa ferðamanna að geta valið þjónustu frá fyrirtækjum sem gera betur í umhverfismálum. Farfuglaheimilin í Reykjavík vinna af heilum hug við að mæta þessum kröfum og eftir dvöl þar eru gestirnir betur upplýstir um leiðir til að draga úr áhrifum á umhverfið. Auk þess miðar umhverfisstarf einnig að því að bæta starfsumhverfi og Farfuglar vilja bjóða starfsfólkinu sínu upp á það besta, líkt og gestunum. Um leið og það er rekstrarlega hagkvæmt er það fyrst og fremst siðferðislega rétt að vinna í anda sjálfbærni að mati Farfugla.

Nánari upplýsingar veita Markús Einarsson framkvæmdastjóri Farfugla, markus@hostel.is, s: 861 9434 Ásta Kristín Þorsteinsdóttir verkefnisstjóri, astakristin@hostel.is, s: 868 0979

Bewertung

Viðurkenningar veittar á degi umhverfisins

Svandís Svavarsdóttir umhverfisráðherra afhenti Sigrúnu Helgadóttur náttúruverndarviðurkenningu Sigríðar í Brattholti við athöfn í Þjóðmenningarhúsinu í dag. Haldið var upp á dag umhverfisins í dag með afhendingu viðurkenninga og ýmsum viðburðum. Við sama tækifæri fékk prentsmiðjan Oddi afhentan Kuðunginn, umhverfisviðurkenningu umhverfisráðuneytisins og nemendur Hvolsskóla voru útnefndir varðliðar umhverfisins.

Sigrún Helgadóttir hlaut náttúruverndarviðurkenningu Sigríðar í Brattholti

Svandís Svavarsdóttir umhverfisráðherra afhenti Sigrún Helgadóttur náttúruverndarviðurkenningu Sigríðar í Brattholti en þetta var í fyrsta sinn sem sú viðurkenningin er afhent. Umhverfisráðherra ákvað að veita viðurkenninguna í tilefni af tuttugu ára afmæli umhverfisráðuneytisins í ár.
Sigrún Helgadóttir hefur helgað starfskrafta sína umhverfismálum, ekki síst við að miðla fræðslu til barna og ungmenna en einnig hefur hún lagt mikla áherslu á mikilvægi þess að auka skilning almennings á náttúru og umhverfi.

Á árunum 2000 til 2008 var Sigrún verkefnisstjóri Grænfánaverkefnisins. Hún skipulagði það frá upphafi og stýrði því þar til þátttökuskólarnir voru komnir yfir eitt hundrað talsins og á öllum skólastigum.

Sigrún hefur þýtt og staðfært námsefni í umhverfisfræðum og einnig skrifað námsefni í náttúru- og umhverfisfræðum, bæði fyrir nemendur og kennara. Þá hefur hún samið vandaða og afar fróðlega bók um Jökulsárgljúfur, Dettifoss og Ásbyrgi en hún var þar landvörður. Hún var fyrsti landvörður þjóðgarðsins í Jökulsárgljúfrum og mótaði þá starf landvarða og beindi því inn á þá braut að landverðir túlkuðu náttúru fyrir gesti til að auka skilning þeirra á henni.

Að auki hefur Sigrún starfað með ýmsum félögum að umhverfismálum og hefur einnig komið þekkingu sinni á framfæri á vettvangi stjórnmálanna. Hún starfaði með hópi áhugafólks um umhverfismál, Græna hópnum, sem lét til sín taka og hvatti meðal annars mjög til stofnunar sérstaks ráðuneytis umhverfismála. Síðar var hún varaþingkona Kvennalistans 1987-1991 og 1994-1995. Hún bar þá fram ýmsar hugmyndir varðandi umhverfismál og átti meðal annarra stóran þátt í að semja þingmál um stofnun sérstaks umhverfisráðuneytis sem Kvennalistinn lagði fram á Alþingi. Einnig bar hún fram mörg ný sjónarmið, til dæmis um grænan hagvöxt, nýja skilgreiningu hagvaxtarhugtaksins og kvenlæga vistfræði.

Prentsmiðjan Oddi hlaut Kuðunginn

Svandís Svavarsdóttir umhverfisráðherra afhenti Þóru Hirst, gæðastjóra prentsmiðjunnar Odda Kuðunginn fyrir framlag fyrirtækisins til umhverfismála á liðnu ári.
Í máli Sigþrúðar Jónsdóttur, formanns valnefndar Kuðungsins, kom fram að fyrirtækið hefði árum saman unnið eftir ákveðinni umhverfisstefnu, það hefði tekið upp umhverfisstaðla og unnið að því að lágmarka neikvæð áhrif starfseminnar á umhverfi og heilsu.Á síðasta ári hlaut  fyrirtækið hina norrænu umhverfisvottun, Svaninn. Svanurinn gerir strangar kröfur til prentsmiðja og lítur meðal annars til orku- og efnanotkunar, sorpflokkunar og rýrnunar. Kröfur Svansins til efnanotkunar í prentsmiðjum eru sérstaklega strangar. Svansvottunin nær yfir alla prentþjónustu  Odda og fyrirtækið er fyrsta prentsmiðjan í heiminum sem hefur hlotið Svansvottun á framleiðslu bylgjukassa.

Bewertung